بین الاقوامی اسلامی یونیورسٹی اسلام آباد کے شعبہ امتحانات سے وابستہ سپرنٹنڈنٹ محمد اسحاق مرزا گزشتہ روز رضائے الٰہی سے وفات پا گئے۔ ان کے انتقال کی خبر سن کر جامعہ کے ملازمین، اساتذہ اور احباب میں گہرے رنج و غم کی لہر دوڑ گئی۔
مرحوم محمد اسحاق مرزا شعبہ امتحانات میں اپنی ذمہ داریوں کی انجام دہی، خوش اخلاقی، دیانت داری اور پیشہ ورانہ صلاحیتوں کے باعث ایک نمایاں مقام رکھتے تھے۔ انہوں نے طویل عرصے تک جامعہ کی خدمت کی اور اپنے حسنِ کردار اور بہترین طرزِ عمل سے ساتھیوں کے دلوں میں عزت و احترام حاصل کیا۔
بین الاقوامی اسلامی یونیورسٹی اسلام آباد کے اساتذہ، افسران، ملازمین اور مختلف تنظیموں نے مرحوم کے انتقال پر دلی افسوس کا اظہار کرتے ہوئے ان کے اہلِ خانہ سے تعزیت کی ہے۔ دعا کی گئی ہے کہ اللہ تعالیٰ مرحوم کو اپنی جوارِ رحمت میں اعلیٰ مقام عطا فرمائے، ان کی مغفرت فرمائے اور پسماندگان کو یہ صدمہ صبر و حوصلے کے ساتھ برداشت کرنے کی توفیق عطا فرمائے۔ آمین۔